ဤသင်ရိုးသည် ပညာရေးဒီဂရီကောလိပ်ကျောင်းသားများအား အလယ်တန်းကလေးများ၏ နေ့စဉ်ဘဝအတွက် ဘဝတွက်တာကျွမ်းကျင်စရာများကို ဖြည့်ဆည်းပေးနိုင်ရန် ဖြစ်သည်။ ဘဝတွက်တာကျွမ်းကျင်စရာများသည် လူ့အဖွဲ့အစည်းအတွင်း နေထိုင်ကြသော လူသားများအတွက် နေ့စဉ်တွေ့ကြုံရသော ပြဿနာများကို ဖြေရှင်းနိုင်ပြီး ကျန်းမာပျော်ရွှင်သော ဘဝများရရှိနိုင်ရန် လိုအပ်သော အသိပညာ၊ နားလည်မှုနှင့် သဘောထားများ ဖြစ်ကြသည်။  ဘဝတွက်တာ ကျွမ်းကျင်စရာ တတ်ကျွမ်းမှုကိုးခုဖြစ်သည့် မြန်မာ့အခြေခံပညာ သင်ရိုးညွှန်းတမ်းတွင် ဖော်ပြထားသော ၂၁-ရာစုကျွမ်းကျင်မှုများ - ပြဿနာဖြေရှင်းခြင်း၊ တီထွင်ဖန်တီးခြင်း၊ လေးနက်စွာဆန်းစစ်ဝေဖန် စဉ်းစားခြင်း၊ ဆုံးဖြတ်ချက်ချမှတ်ခြင်း၊ မိမိကိုယ်ကိုယ်သိရှိနားလည်ခြင်း၊ ဆက်သွယ်ပြောဆိုခြင်း၊ တစ်ဦးနှင့်တစ်ဦး အပြန်အလှန် ဆက်ဆံခြင်း၊ ကိုယ်ချင်းစာတရားထားခြင်း၊ စိတ်လှုပ်ရှားမှုနှင့် စိတ်ဖိစီးမှုကို ထိန်းချုပ်တတ်ခြင်း တို့ကို ကျောင်းသားများသည် စူးစမ်းလေ့လာကြရပါမည်။ သင်တန်းတွင် ပညာရေး (ကျွန်ုပ်တို့ဘာကို သင်ကြားရမလဲ) နှင့် သင်နည်းစနစ် (ကျွန်ုပ်တို့ဘယ်လို သင်ကြားပေးရမလဲ) နှစ်ခုစလုံးကို သင်ကြားပေးမည်ဖြစ်သည်။အလယ်တန်းကျောင်းသားများ သင်ယူရာတွင် ကူညီထောက်ပံ့ပေးနိုင်သော သင်ယူမှု လုပ်ငန်းများအား မည်သို့ဖန်တီးမည်၊ မည်သို့ချဉ်းကပ်သင်ကြားပေးမည် ဆိုသည်နှင့် ဘဝတွက်တာ ကျွမ်းကျင်စရာ ဘာသာရပ် စစ်ဆေးအကဲဖြတ်ရာတွင် အသုံးပြုနိုင်သော နည်းပညာအမျိုးမျိုးကို အကျွမ်းတဝင် သိရှိလာမည်ဖြစ်သည်။ လေးနှစ်ပညာရေးဒီဂရီကောလိပ် သင်ရိုးညွှန်းတမ်း အညွှန်းဘောင်အရ ပထမနှစ်နှင့် ဒုတိယနှစ်သင် ကျောင်းသားများသည် ဘဝတွက်တာကျွမ်းကျင်စရာ ဘာသာရပ်၏ အခြေခံ အသိပညာများကို တိုးတက်မြင့်မားအောင် ပြုလုပ်ရန်နှင့် ဘဝတွက်တာကျွမ်းကျင်စရာများ သင်ကြားရေးအတွက် အခြေခံ သင်ကြားရေးနည်းလမ်းဆိုင်ရာ အသိပညာများ ဖွံ့ဖြိုးတိုးတက်စေရန်အတွက် လုပ်ဆောင်ကြရန် မျှော်လင့်ပါသည်။