ဤမော်ဂျူးသည် မြန်မာနိုင်ငံအတွက် မျှော်မှန်းထားသော နိုင်ငံသားများနှင့် လူ့ဘောင်အဖွဲ့အစည်း ဖြစ်ထွန်းလာစေရန် အခြေခံပညာသင်ရိုးညွှန်းတမ်းတွင် ထည့်သွင်း ပျိုးထောင်ထားသည့် တန်ဖိုးထားမှုများနှင့် သဘောထားများကို စံနမူနာအဖြစ်ပြသခြင်းမှတစ်ဆင့် အမျိုးမျိုးသော သင်ယူမှုနယ်ပယ်များနှင့် ဘာသာရပ်များ သင်ကြားရာတွင် လိုအပ်သော ကျွမ်းကျင်မှုများရရှိအောင် ကျောင်းသားများအား ပြင်ဆင်ပေးမည်ဖြစ်သည်။ ဤသင်ရိုး၏အဓိက ရည်ရွယ်ချက်မှာ-ကျောင်းသားများအား ပညာရေးသီအိုရီ၊ ပညာရေးနည်းပညာ၊ ပညာရေးစီမံခန့်ခွဲမှု၊ ပညာရေးစိတ်ပညာနှင့် ပညာရည်စစ်ဆေးအကဲဖြတ်ခြင်း ဆိုင်ရာ  အခြေခံအယူအဆ (သဘောတရား) များနှင့် မိတ်ဆက်ပေးရန်ဖြစ်ပြီး၊ သင်ကြား သင်ယူမှုဖြစ်စဉ်နှင့် လက်တွေ့ဘဝ အခြေအနေများတွင် ၎င်းတို့ကို အသုံးချရန်ဖြစ်ပါသည်။ ကျောင်းသားများအနေဖြင့် ခေတ်အဆက်ဆက်ရှိ ပြည်တွင်းပြည်ပ နေရာဒေသအသီးသီးမှ ပညာရေးသမိုင်းကြောင်းများ၊ ပညာရေးဒဿနအမျိုးမျိုးနှင့် သင်ယူမှု သီအိုရီများကို သိရှိလာမည် ဖြစ်သည်။ ထို့ပြင် ကျောင်းသားများ၏ ဖွံ့ဖြိုးမှုနယ်ပယ်အားလုံးရှိ တိုးတက်မှုမှတ်တိုင်များ၏ အရေးကြီးပုံကိုလည်း နားလည်သိရှိလာပါလိမ့်မည်။ သင်ကြားနည်း ဆိုင်ရာ အသိပညာများ ရရှိလာပြီး ကျောင်းသားများ၏ သင်ယူမှုလိုအပ်ချက်များနှင့် အခြေအနေများ အပေါ်မူတည်၍ အကောင်းဆုံးသော သင်ကြားမှု အလေ့အကျင့်များကို ရွေးချယ် အသုံးပြုနိုင်ပါမည်။ ထို့ပြင် ကျောင်းသားများသည် စာမေးပွဲစစ်ဆေးခြင်း၊ တိုင်းတာခြင်း၊ အကဲဖြတ်ခြင်းနှင့် စစ်ဆေး အကဲဖြတ်ခြင်းတို့၏ သွင်ပြင်လက္ခဏာများကို ခွဲခြားသိရှိလာပြီး၊ သင်ကြားသင်ယူမှုဖြစ်စဉ်တွင် အသုံးချတတ်လာပါမည်။