ဤသင်ရိုး၏အဓိက ရည်ရွယ်ချက်မှာ-ကျောင်းသားများအား ပညာရေးသီအိုရီ၊ ပညာရေးနည်းပညာ၊ ပညာရေးစီမံခန့်ခွဲမှု၊ ပညာရေးစိတ်ပညာနှင့် ပညာရေး စစ်ဆေးတိုင်းတာမှုနှင့်အကဲဖြတ်ခြင်းဆိုင်ရာ အခြေခံ အယူအဆ (သဘောတရား)များနှင့် မိတ်ဆက်ပေးရန်ဖြစ်ပြီး၊ သင်ကြား၊ သင်ယူမှုဖြစ်စဉ်နှင့် လက်တွေ့ဘဝ အခြေအနေများတွင် ၎င်းတို့ကို အသုံးချရန်ဖြစ်ပါသည်။ ကျောင်းသားများသည် ပညာရေး၏သမိုင်းကြောင်းများ၊ ပညာရေးဒဿနအမျိုးမျိုး၊ သင်ယူမှု သီအိုရီများနှင့် ယခုခေတ်ပညာရေး၏ ဦးတည်ရာလမ်းကြောင်းများကို သိရှိလာမည်ဖြစ်သည်။ ထို့အပြင် ကျောင်းသားများ၏ ဖွံ့ဖြိုးမှုနယ်ပယ်အားလုံးရှိ တိုးတက်မှုမှတ်တိုင်များ၏ အရေးကြီးပုံကိုလည်း သိရှိလာပါလိမ့်မည်။ သင်ကြားနည်းဆိုင်ရာ အသိပညာများကို ရရှိလာပြီး ကျောင်းသားများ၏ သင်ယူမှုလိုအပ်ချက်များနှင့် သင်ယူသည့်အခြေအနေများအပေါ်မူတည်လျက် အကောင်းဆုံးသော သင်ကြားမှုအလေ့အကျင့်များကို ရွေးချယ်နိုင်လာပါလိမ့်မည်။ ထို့အပြင် ကျောင်းသားများသည် စစ်ဆေးခြင်း၊ တိုင်းတာခြင်း၊ တန်ဖိုးဖြတ်ခြင်းနှင့် စစ်ဆေးအကဲဖြတ်ခြင်းတို့၏ သွင်ပြင်လက္ခဏာများကို ခွဲခြားသိရှိလာပြီး၊ သင်ကြားသင်ယူဖြစ်စဉ်တွင် ပြန်လည် အသုံးပြုနိုင်ပါလိမ့်မည်။ ကျောင်းသားများအား ထိရောက်သော ပညာရေးကျွမ်းကျင်သူများဖြစ်လာစေရန်၊ ပညာပေးရန် ပညာရေး ဘာသာရပ်တွင် စိတ်ပညာနှင့် ပညာရေးသမိုင်းဟူ၍ အပိုင်းနှစ်ပိုင်းရှိပါသည်။ ပညာရေးတိုးတက်မှုကို ဝေဖန်ပိုင်းခြားဆန်းစစ်ခြင်းက ကျောင်းသားများ၏ သဘောထားများ၊ တန်ဖိုးထားမှုနှင့်စွမ်းရည်များကို ပြောင်းလဲပေးရာတွင် ကူညီပါလိမ့်မည်။ ထို့အတူ ပညာရေးကျွမ်းကျင်သူ ဆရာတစ်ဦးတွင် ရှိသင့်ရှိထိုက်သော သဘောထားများနှင့် တန်ဖိုးထားမှုများကိုလည်း ဖွံ့ဖြိုးတိုးတက်လာစေမည်ဖြစ်ပါသည်။