သင်္ချာပညာကို တတ်ကျွမ်းမှုရှိအောင် သင်ကြားပေးရန် ပညာရေးကောလိပ်ကျောင်းသားများကို ပြင်ဆင် လေ့ကျင့်ပေးမည်ဖြစ်သည်။ ၂၁-ရာစု နိုင်ငံသားတစ်ဦးသည် အလုပ်ခွင်နှင့် အခြားဘဝ အခြေအနေများတွင် ပြဿနာများကို ဖြေရှင်းရန် သင်္ချာပညာကျွမ်းကျင်မှုစွမ်းရည်ရှိဖို့ လိုသည်။ လူတိုင်းလူတိုင်းသင်္ချာပညာရှင်တစ်ယောက် ဖြစ်လာရန် အလားအလာရှိပြီး ကျောင်းသူ ကျောင်းသားများအား ထိုသို့ဖြစ်လာအောင် ကူညီပံ့ပိုးပေးရာတါင် သင်ကြားပြသသည့် ဆရာသည် အခရာကျသည်။ မြန်မာနိုင်ငံ ဆရာအတတ်သင် ပညာရေးအတွက် မျှော်မှန်းချက်မှာ လေးနှစ်သင်ဒီဂရီသင်တန်းပြီးဆုံးပြီးနောက် ပူးပေါင်းဆောင်ရွက် ပြဿနာဖြေရှင်းရာတွင် နက်ရှိုင်းသည့် နားလည်သဘောပေါက်မှုနှင့် ကျွမ်းကျင်မှု စွမ်းရည်များ ရှိသည့် ဘွဲ့ရများကို မွေးထုတ်ပေးရန်ဖြစ်သည်။ ပညာရပ်ဆိုင်ရာအကြောင်းအရာ (ကျွန်ုပ်တို့ သင်ကြားပို့ချရသည့်အရာ) နှင့် နည်းပညာဆိုင်ရာ အကြောင်းအရာ (ကျွန်ုပ်တို့ သင်ကြားပို့ချပုံ) နှစ်မျိုးစလုံးသည် အရေးကြီးပြီး ဤသင်ရိုးတွင် ၎င်းတို့ နှစ်မျိုးပေါင်းစပ်ထားသည့် ချဉ်းကပ်မှုဖြင့် တင်ပြထားသည်။ အမျိုးမျိုး ကွဲပြားခြားနားသည့် ကျောင်းသူကျောင်းသားများ၏ လိုအပ်ချက်များနှင့် ကိုက်ညီအောင် သင်ကြားမှုပုံစံကို ပြောင်းလဲပြင်ဆင် သင်ကြားပေးနိုင်သည့် ဆရာများဖြစ်လာစေရန်အတွက် ပညာရေးကောလိပ် ကျောင်းသားများသည် အလယ်တန်းကျောင်းသူကျောင်းသားများအား ပို၍ နက်နက်ရှိုင်းရှိုင်း လေ့လာသင်ယူနိုင်အောင် ကူညီပေးမည့် လုပ်ငန်းစဉ်များကို ဖန်တီးနိုင်စွမ်းရှိစေရန် ဘာသာရပ်သင်ခန်းစာ ခေါင်းစဉ်များအား သင်ယူမှုရလဒ်ကောင်းများ ရှိလာအောင် မည်သို့လုပ်ဆောင်ရမည်ကို လေ့လာသင်ယူရမည်ဖြစ်သည်။ သူတို့သည် သူတို့ သင်ကြားရမည့် ကျောင်းသူကျောင်းသားတို့၏ အသက်အရွယ်နှင့် သင့်တော်သည့် သူတို့ ကိုယ်ပိုင်သင်ကြားမှု အထောက်အကူပြုပစ္စည်းများကို မည်သို့ ဖန်တီးပြုလုပ်ရမည်ကို သိရှိရမည် ဖြစ်သည်။