ဘဝတွက်တာကျွမ်းကျင်စရာ ဘာသာရပ်၏ ခြုံငုံထားသော ယေဘုယျရည်ရွယ်ချက်များမှာ ပညာရေးဒီဂရီကောလိပ်ကျောင်းသားများအား မြန်မာနိုင်ငံ၏ အနာဂတ်နိုင်ငံ့သားကောင်းများ လူ့ဘောင်အဖွဲ့အစည်းများကို ဖန်တီးမြှင့်တင်ပေးနိုင်သည့် အခြေခံပညာသင်ရိုးညွှန်းတမ်း၏ တန်ဖိုးထားမှုနှင့် သဘောထားများကို နမူနာယူပြီး ကျောင်းသားများကို ဘဝတွက်တာကျွမ်းကျင်စရာ ဘာသာရပ် သင်ကြားနိုင်ရန် လိုအပ်သော ကျွမ်းကျင်မှုများကို မြှင့်တင်ပေးရန် ပြင်ဆင်ပေးသွားမည်ဖြစ်သည်။ ဘဝတွက်တာကျွမ်းကျင်စရာဆိုသည်မှာ လူ့အဖွဲ့အစည်းအတွင်းမှ လူသားတစ်ဦးအနေဖြင့် ပိုမိုကောင်းမွန်သော အသက်ရှင်သန်မှု နည်းလမ်းများနှင့် ကျန်းမာပျော်ရွှင်စွာဖြင့် အသက်ရှင်ရပ်တည်နိုင်ရန်အတွက် လိုအပ်သော အသိပညာ၊ ကျွမ်းကျင်မှုနှင့် စိတ်နေသဘောထားများကို ဆိုလိုပါသည်။ မျိုးဆက် တစ်ခုမှတစ်ခုသို့ တန်ဖိုးထားဖြန့်ဝေထားသော မြန်မာနိုင်ငံ၏ ဗလ ၅ တန်နှင့် ကိုက်ညီစွာနှင့် လျင်မြန်စွာ တိုးတက်ပြောင်းလဲနေသော ခေတ်နှင့်လျော်ညီသော ကျွမ်းကျင်မှုများနှင့်အတူ နိုင်ငံ့သားကောင်းများ ဖြစ်လာစေရန် ရည်ရွယ်သည့် ၂၁ ရာစု ကျွမ်းကျင်မှုများကို အခြေခံပြီး ဘဝတွက်တာကျွမ်းကျင်စရာ ဘာသာရပ်တွင် အခြေခံကျွမ်းကျင်မှု ၉ ခုကို သင်ကြားသွားမည် ဖြစ်သည်။ ကျောင်းသားများသည် မြန်မာနိုင်ငံ၏ အခြေခံပညာသင်ရိုးညွှန်းတမ်းတွင် ဖော်ပြထားသော ပြဿနာဖြေရှင်းခြင်း၊ တီထွင်ကြံဆတတ်ခြင်း၊ လေးနက်စွာဆန်းစစ်ဝေဖန်ခြင်း၊ ဆုံးဖြတ်ချက်ချခြင်း၊ ဆက်သွယ်ပြောဆိုခြင်း၊ မိမိကိုယ်မိမိ သိရှိနားလည်ခြင်း၊ တစ်ဦးနှင့်တစ်ဦး အပြန်အလှန် ဆက်ဆံခြင်း၊ ကိုယ်ချင်းစာတရားထားတတ်ခြင်း၊ စိတ်ခံစားချက်များနှင့်  စိတ်ဖိစီးမှုများကို ဖြေရှင်းတတ်ခြင်း စသည့် ၂၁ ရာစု ကျွမ်းကျင်မှုများကို ကျယ်ပြန့်စွာ သင်ယူရမည် ဖြစ်သည်။ ဤဘာသာရပ်သည် စာပေအကြောင်းအရာများ (မည်သည့်အရာကို သင်ကြားမည်) နှင့် သင်ပြနည်းများ (မည်သို့ သင်ကြားမည်) စသည့် အကြောင်းအရာများကို သင်ယူရမည်ဖြစ်သည်။