သမားရိုးကျ အတန်းတွင်း စစ်ဆေးမှုများနှင့် နှိုင်းယှဉ်ကြည့်ပါက  သင်ယူမှုအထောက်အထား မှတ်တမ်းများ (portfolios) သည် ပိုမို၍စစ်မှန်သော စစ်ဆေးအကဲဖြတ်မှုမျိုးကို ပေးစွမ်းနိုင်သည်ဟု ယူဆလေ့ရှိကြသည်။ portfolio တစ်ခုသည် ကျောင်းသားတစ်ဦးက သင်ယူလိုက်သည့်  အကြောင်းအရာကို နားလည်ကြောင်း သက်သေပြပေးရုံသာမဟုတ်ဘဲ  ၎င်းတို့အား ပြန်လည်အသုံးချနိုင်သည့် စွမ်းရည်ကို ဖော်ပြပေးသည်။ ဥပမာ စာမေးပွဲတစ်ခုသည် ဝတ္ထုတိုတစ်ခုတွင် ပါဝင်သော အစိတ်အပိုင်းများအပေါ် ကျောင်းသားများ၏ နားလည်မှုကို အကဲဖြတ်နိုင်သော်လည်း portfolio တစ်ခုတွင်မူ ဝတ္ထုတိုတစ်ပုဒ် ဖန်တီးရေးသားနိုင်သည့် ကျောင်းသားများ၏ စွမ်းရည်ကို ပြသနိုင်သည်။ ယခင် “ဆရာအတတ်ပညာ ဖွံ့ဖြိုးတိုးတက်မှုအတွက် TCSF (TCSF for Teacher Professional Development)” ဟူသည့် သင်တန်းတွင် သင်ယူခဲ့သည့်အတိုင်း သင်ကြားရေး အတတ်ပညာတွင် ဆရာများအတွက် တတ်ကျွမ်းမှု စံသတ်မှတ်ချက် အညွှန်းဘောင်  (Teacher Competency Standards Framework-TCSF) ကဲ့သို့သော အညွှန်းဘောင်အပေါ် အခြေခံ၍ လုပ်ငန်းခွင်ဝင်စ ဆရာများကို အကဲဖြတ်နိုင်မည့်အပြင် ၎င်းတို့၏ တတ်ကျွမ်းမှုများကိုပြသနိုင်ရန်အတွက် သင်ကြားရေးအတတ်ပညာ အထောက်အထားမှတ်တမ်း (professional portfolio) တစ်ခုကို ရေးဆွဲနိုင်မည်ဖြစ်သည်။  ရှေ့တွင် ပို့ချခဲ့ပြီးသော “ဆရာအတတ်ပညာ ဖွံ့ဖြိုးတိုးတက်မှုအတွက် TCSF (TCSF for Teacher Professional Development)” ဟူသည့် သင်တန်းအပေါ် အခြေခံပြီး ဤသင်တန်းကို ရေးဆွဲထားသည်။ ထို့ပြင် ဆရာများသည် portfolio ကို စစ်ဆေးအကဲဖြတ်သည့် နည်းကိရိယာအဖြစ် အသုံးပြုရသည့် အကြောင်းရင်းနှင့် အသုံးပြုပုံကို ပိုမိုစူးစမ်းလေ့လာနိုင်မည်။ ထို့နောက် လုပ်ငန်းခွင်၌ တာဝန်ထမ်းဆောင်စ ဆရာများသည် ၎င်းတို့၏ သင်ကြားရေးစွမ်းရည်ကို ပြန်လည်သုံးသပ်ရန် professional portfolio ကို အသုံးပြုသည့် နမူနာများကို ကြည့်ရှုလေ့လာနိုင်မည် ဖြစ်သည်။ ဤသင်တန်းတွင် အောက်ပါ မော်ဂျူးများကို လေ့လာရပါမည်။

မော်ဂျူး (၁) သင်ယူမှုအထောက်အထားမှတ်တမ်း (portfolio) ဖြင့် စစ်ဆေးအကဲဖြတ်ခြင်းကို မိတ်ဆက်ခြင်း

(၁.၁) ‘သင်ယူမှုကို စစ်ဆေးအကဲဖြတ်ခြင်း’နှင့် ‘သင်ယူမှုအတွက် စစ်ဆေးအကဲဖြတ်ခြင်း’ တို့တွင် portfolio ကို အသုံးပြုခြင်း

(၁.၂) Portfolio ဖြင့် စစ်ဆေးအကဲဖြတ်ခြင်း အမျိုးအစားများ၊ အကျိုးကျေးဇူးများနှင့် စိန်ခေါ်မှုများ

(၁.၃) Portfolio ကို အမှတ်ပေးခြင်း

မော်ဂျူး (၂) သင်ကြားရေး အတတ်ပညာ အထောက်အထားမှတ်တမ်း (professional portfolio)

(၂.၁) 'သင်ယူခြင်း၊ အသုံးချခြင်း၊ ပြန်လည်သုံးသပ်ခြင်း' လုပ်ငန်းစဉ်

(၂.၂) Professional portfolio တစ်ခုကို တည်ဆောက်ခြင်း

ဤသင်တန်းကို သင်ယူပြီးချိန်တွင် သင်သည် -

• သင်ယူမှုအထောက်အထားမှတ်တမ်း (portfolio) အမျိုးအစား နှစ်ခုကို ခွဲခြားတတ်မည်။
• Portfolio ဖြင့် စစ်ဆေးအကဲဖြတ်ရာတွင် ‘သင်ယူမှုကို စစ်ဆေးအကဲဖြတ်ခြင်း’နှင့် ‘သင်ယူမှုအတွက် စစ်ဆေးအကဲဖြတ်ခြင်း’ ချဉ်းကပ်မှုနှစ်ခုစလုံးကို မည်သို့ ထည့်သွင်းလုပ်ဆောင်နိုင်ကြောင်းကို ရှင်းပြတတ်မည်။
• စစ်ဆေးအကဲဖြတ်ခြင်းအတွက်  portfolio များကို အသုံးပြုခြင်း၏ အကျိုးကျေးဇူးများနှင့် စိန်ခေါ်မှုများကို စာရင်းပြုစုတတ်မည်။
• Portfolio များကို အဆင့်သတ်မှတ်ရာတွင် အသုံးပြုသော အမှတ်ပေးသည့် နည်းကိရိယာများကို ခွဲခြားသတ်မှတ်တတ်မည်။
• သင်ယူခြင်း-အသုံးချခြင်း-ပြန်လည်သုံးသပ်ခြင်း' လုပ်ငန်းစဉ်ကို စုံစမ်းလေ့လာတတ်မည်။
• ဂစ်ဘ် (Gibb) ၏ ပြန်လည်သုံးသပ်မှုလုပ်ငန်းစဉ် အဆင့်များကို သတ်မှတ်ဖော်ထုတ်တတ်မည်။
• ဆရာများနှင့် ကျောင်းသားများအတွက် ပြန်လည်သုံးသပ်ခြင်း၏ အကျိုးကျေးဇူးများကို ဆွေးနွေးတတ်မည်။
• မြန်မာနိုင်ငံ ဆရာများအတွက် တတ်ကျွမ်းမှု စံသတ်မှတ်ချက် အညွှန်းဘောင်မှ ဖော်ပြထားရှိသည့် တတ်ကျွမ်းမှု နယ်ပယ်များကို ပြန်လည်ဆန်းစစ်နိုင်မည်။
• မြန်မာနိုင်ငံ ဆရာများအတွက် တတ်ကျွမ်းမှု စံသတ်မှတ်ချက် အညွှန်းဘောင် အကဲဖြတ်ဇယား (TCSF tracker) နှင့်သက်ဆိုင်သည့် professional portfolio တွင် ထည့်သွင်းနိုင်သော အထောက်အထား အမျိုးအစားများကို ခွဲခြားသတ်မှတ်နိုင်မည်။