မသန်စွမ်းကလေးများသည်လည်းအခြားကလေးများနည်းတူပညာသင်ယူခွင့်ရှိကြောင်းကို လူ့အခွင့် အရေး ကြေညာချက်စာတမ်း အပိုဒ် (၂၆) တွင်လည်းကောင်း၊ ကမ္ဘာ့ကုလသမဂ္ဂ မသန်စွမ်းသူများ အခွင့်အရေးဆိုင်ရာသဘောတူစာချုပ်အပိုဒ်(၂၄)တွင်လည်းကောင်း၊ရေရှည်ဖွံ့ဖြိုးတိုးတက်ရေးပန်းတိုင်များ၏ရည်ရွယ်ချက် (၄) တွင်လည်းကောင်းအသီးသီးဖော်ပြထားပါသည်။ ထို့သို့ဖော်ပြတိုက်တွန်း ချက်များရှိနေသော်လည်းမြန်မာနိုင်ငံရှိမသန်စွမ်းကလေးအများစုသည်ပညာသင်ခွင့်ဆုံးရှုံးနေဆဲဖြစ်သည်။ထိုသို့ဖြစ်နေရသည်မှာမသန်စွမ်းကလေးများအနေဖြင့်ပညာသင်ယူနိုင်စွမ်းမရှိသောကြောင့်မဟုတ်ဘဲမြန်မာနိုင်ငံတွင်မသန်စွမ်းမှုနှင့်လူတိုင်းအကျုံးဝင်ပညာရေးဆိုင်ရာအသိပညာများ ဖြန့် ဝေမှုအား နည်းနေမှုကြောင့်မသန်စွမ်းကလေးများ၏ပညာသင်ယူနိုင်မှုကိုဖြည့်ဆည်းပေးရန်အတွက် လိုအပ်နေ သော ပညာရေးစနစ်နှင့်မူဝါဒမခိုင်မာသေးသောကြောင့်ဖြစ်သည်။ ကျွန်ုပ်တို့လူမှုအသိုင်းအဝိုင်းတွင် မှားယွင်းစွာယူဆထားခဲ့ကြသည်မှာမသန်စွမ်းကလေးများသည်သူတို့တွင်ရှိနေသောချို့ယွင်းအား နည်း ချက်များကြောင့် အခြားကလေးများကဲ့သို့ ပညာမသင်ကြားနိုင်ကြဟု ယူဆမိ တတ်ကြပါသည်။ အမှန်သည်ကားမသန်စွမ်းကလေးများပညာသင်ယူခွင့်ဆုံးရှုံးနေရသည်မှာသူတို့၏ ချို့ယွင်းအားနည်းချက်များရှိသောကြောင့်မဟုတ်ဘဲ လက်ရှိကျင့်သုံးနေသောပညာရေးစနစ်သည် သူတို့၏ လိုအပ်ချက်ကို မဖြည့်ဆည်းနိုင်သေးသောကြောင့် ဖြစ်သည်။ တစ်နည်းအားဖြင့် လူတိုင်းအကျုံးဝင်ပညာရေး ကို လက်တွေ့အကောင်အထည်ဖော်ရန် အားနည်းနေခြင်းကြောင့်ဖြစ်သည်။ထို့ကြောင့်  ဤသင်ခန်းစာသည် ၂၀၂၀ ပြည့်နှစ် စက်တင်ဘာလတွင် ပြဌာန်းခဲ့သော ဆရာများအတွက် တတ်ကျွမ်း မှု စံသတ်မှတ်ချက် အညွှန်းဘောင်(Teacher Competencies Standard Framework) ၏ အချို့သော အညွှန်းကိန်းများကိုအခြေခံထားပါသည်။ထို အညွှန်းကိန်းများမှာ-

• (ဂ)(၃.၁.၁) ကျောင်းသားတစ်ဦးချင်းဆီရှိ စွမ်းဆောင်ရည် အလိုက် ပြုစုပျိုးထောင်ရန် တာဝန်ယူခြင်းနှင့်ကလေးတိုင်း၏ပညာရေးဆိုင်ရာအခွင့်အလမ်းများကိုအသိအမှတ်ပြုကြောင်းပြသည်။
• (ဂ) (၃.၁.၂) ကျောင်းသားများ၏ ကွဲပြားခြားနားသော လူမှုအခြေအနေများနှင့် နောက်ခံအကြောင်းများကို အသိအမှတ်ပြုပြီး ကျောင်းသားအားလုံးအား တန်းတူညီမျှ ဆက်ဆံသည်။ထိုကြောင့်ဤသင်ခန်းစာမှတစ်ဆင့် မသန်စွမ်းမှုဆိုင်ရာ အမြင်သစ်နှင့် လူတိုင်းအကျုံးဝင်ပညာရေး ဆိုင်ရာ သိမှတ်ဖွယ်ရာများကို မျှဝေသွားမည်ဖြစ်ပါသည်။

• မသန်စွမ်းကလေးများအပါအဝင် ကလေးတိုင်းအတွက် ပညာသင်ကြားခွင့်သည် မွေးရာပါအခွင့်အရေး တစ်ရပ်ဖြစ်ကြောင်းသိရှိလက်ခံနိုင်ရန်နှင့်သင်ယူသူမသန်စွမ်းကလေးတစ်ဦးချင်းစီအား ပင်မစာသင်ခန်း အတွင်းသင့်လျော်သောကူညီပံ့ပိုးမှုများလက်လှမ်းမီရရှိနိုင်ပါက အခြားသင်ယူသူ ကလေးများနှင့် အတူ အခက်အခဲမရှိ ကောင်းစွာပညာသင်ယူနိုင်ကြောင်းသိရှိလာစေရန်။

• လက်ရှိကမ္ဘာ့ရေစီးကြောင်းတွင်လက်ခံထားကြသည့် မသန်စွမ်းမှုဆိုင်ရာလူမှုရေးအမြင်အရ မသန်စွမ်း မှု (Disability)၊ ချို့ယွင်းမှု (Impairment)၊ အတားအဆီး (Barrier)နှင့် လက်လှမ်းမီခြင်း Accessibility)တို့၏သဘောတရားများ၊ဆိုလိုရင်းများကိုသိရှိစေရန်နှင့် မသန်စွမ်းကလေးများ အားပင်မကျောင်းများတွင်သင်ကြားပေးခြင်းသည်ကလေးတိုင်း၏မွေးရာပါပညာရေး ဆိုင်ရာ အခွင့်အရေးကိုအကောင်အထည်ဖော်ခြင်းဖြစ်ကြောင်း သိရှိနိုင် စေရန်။
• မသန်စွမ်းကလေးများ၏ပညာသင်ယူခွင့်ကိုဖြည့်ဆည်းပေးနိုင်ရန်အတွက် ကြိုးစားဖေါ်ဆောင် လာခဲ့ သည့် ပညာရေးစနစ် (၃) မျိုးနှင့် ၎င်းတို့၏အကျိုးသက်ရောက်မှုကို သိရှိစေရန် နှင့် လူတိုင်းအကျုံးဝင်ပညာရေးသည် လက်တွေ့ကျသော စနစ်တစ်ခု အဖြစ်သိ မြင်လာစေရန်။
• လူတိုင်းအကျူုံးဝင်ပညာရေး၏အယူအဆ၊ အခြေခံမှုများနှင့် လက်တွေ့ အကောင်အထည်ဖော်ရာတွင် ကြုံ တွေ့ နေရသည့် အတားအဆီးများကို သိရှိစေရန်။ 
• သင်ကြားမှု၊သင်ယူမှုဖြစ်စဉ်တွက်မသန်စွမ်းကလေးများပါဝင်သင်ယူနိုင်သော လူတိုင်းအကျုံး ၀င်သင်ယူပျော်ပတ်ဝန်းကျင် ဖန်တီးလာနိုင်ရန်အတွက် စိတ်ကူးစိတ်သန်းများ ရရှိစေရန်နှင့် လက်တွေ့ အသုံးချနိုင်စေရန်။
• မသန်စွမ်းကလေးတစ်ဦး၏ ပညာသင်ယူမှုတွင် မိဘများ၊ ဆရာ/ဆရာမများ၊ သူငယ်ချင်းများ၏ ပံ့ပိုးကူညီအားပေးမှုများက မည်မျှ အရေးကြီးကြောင်းသိရှိစေရန်။