Myanmar Teacher Platform (MTP) သည် မြန်မာနိုင်ငံရှိ ဆရာများအတွက် တတ်ကျွမ်းမှုစံသတ်မှတ်ချက် အညွှန်းဘောင် (MTCSF) နှင့်အညီ ဆရာအတတ်ပညာ စဉ်ဆက်မပြတ် စွမ်းဆောင်ရည် ဖွံ့ဖြိုးတိုးတက်မှုကို အထောက်အကူပြုရန် ရန်ကုန်မြို့ရှိ ယူနက်စကို မြန်မာရုံးခွဲ မှ အကောင်အထည်ဖော်လျက်ရှိသော အွန်လိုင်းသင်ယူမှုပလက်ဖောင်းတစ်ခု ဖြစ်ပါသည်။ ယူနက်စကို မြန်မာရုံးခွဲ ၏ နည်းပညာဆိုင်ရာ ဦးဆောင်မှုဖြင့် ရေးဆွဲထားသည့် အဆိုပါအညွှန်းဘောင်သည် ဆရာများ၏ သင်ကြားရေး အသက်မွေးဝမ်းကျောင်း တစ်လျှောက်တွင် မျှော်မှန်းထားသည့် တတ်ကျွမ်းမှုများ၊ အသိပညာ၊ အတတ်ပညာ၊ ကျွမ်းကျင်မှုများနှင့် သဘောထားခံယူချက်များကို ဖော်ပြထားကာ သင်ယူသူအားလုံးအတွက် အရည်အသွေးပြည့်ဝ၍ လူတိုင်းအကျုံးဝင်ပြီး သာတူညီမျှမှုရှိသော ပညာရေးကို ဖော်ဆောင်ရာတွင် အဓိကအခန်းကဏ္ဍမှ ပါဝင်လျက်ရှိပါသည်။

ဤသင်ယူမှုပလက်ဖောင်းသည် ဘေးကင်းလုံခြုံပြီး ဆရာများ၊ ဆရာအတတ်သင်နည်းပြများနှင့် ဆရာအတတ်သင် ကျောင်းသားများအပါအဝင် လူတိုင်းအကျုံးဝင်ပါဝင်နိုင်စေရန် ရည်ရွယ်ဖန်တီးထားသည့် ဒစ်ဂျစ်တယ်ရပ်ဝန်းတစ်ခု ဖြစ်ပါသည်။ မြန်မာနိုင်ငံရှိ ဆရာများအတွက် တတ်ကျွမ်းမှုစံသတ်မှတ်ချက်အညွှန်းဘောင် (MTCSF) နှင့်အညီ ဆရာအတတ်ပညာ စဉ်ဆက်မပြတ် စွမ်းဆောင်ရည် ဖွံ့ဖြိုးတိုးတက်ရေးနှင့် သင်ကြားရေးစွမ်းရည် မြှင့်တင်မွမ်းမံရေးတို့အတွက် လိုအပ်သော သင်ယူမှုအခွင့်အလမ်းများ၊ အရည်အသွေးမြင့် အရင်းအမြစ်များနှင့် ပူးပေါင်းဆောင်ရွက်နိုင်သော ကွန်ရက်များကို လက်လှမ်းမီရရှိနိုင်ရန် ရည်ရွယ်ပြီး ဤသင်ယူမှုပလက်ဖောင်းကို အောက်ပါကဏ္ဍများဖြင့် စနစ်တကျ ဖွဲ့စည်းထားပါသည်-

၁။ အွန်လိုင်းသင်တန်းများ (E-Learning) - အွန်လိုင်းသင်တန်းများကို မိမိတို့အတွက် အဆင်ပြေသည့်အချိန်တွင် သင်ယူနိုင်သည့်စနစ်ဖြင့်သော်လည်းကောင်း၊ တစ်ပြိုင်နက် သင်ယူမှုစနစ်ဖြင့်သော်လည်းကောင်း အခမဲ့ တက်ရောက်နိုင်ပါသည်။ သင်တန်းများကို သင်ယူသူတို့၏ လိုအပ်ချက်နှင့် ကိုက်ညီစေရန် အဆင့်အလိုက် ပြုစုထားရှိပြီး လုပ်ငန်းခွင်အကြို ဆရာဖြစ်သင်တန်းများမှစ၍ လုပ်ငန်းခွင်ကျွမ်းကျင်မှု တိုးတက်ရေး အစီအစဉ်များအထိ ကျယ်ပြန့်စွာ လွှမ်းခြုံပါဝင်ပါသည်။ သင်တန်းတက်ရောက်စဉ်အတွင်း ဆွေးနွေးမှုဖိုရမ်များမှတစ်ဆင့် အခြားဆရာများနှင့် အလွယ်တကူ ချိတ်ဆက်ဆောင်ရွက်နိုင်ကာ သင်တန်းပြီးဆုံးပါကလည်း သင်တန်းဆင်းလက်မှတ်များ ရရှိမည် ဖြစ်ပါသည်။

၂။ အွန်လိုင်းစာကြည့်တိုက် (E-Library) - အွန်လိုင်းစာကြည့်တိုက်တွင် အီလက်ထရွန်နစ်စာအုပ်များ (e-books)၊ ရုပ်သံဗီဒီယိုများနှင့် အခြားပညာရေးဆိုင်ရာ အထောက်အကူပြုပစ္စည်းများ အပါအဝင် သင်ယူမှုအရင်းအမြစ်ပေါင်း ၇၀၀ ကျော်ကို စုံလင်စွာ စုစည်းတင်ဆက်ထားပါသည်။ ဤအရင်းအမြစ်များကို အွန်လိုင်းသင်တန်းများနှင့် ချိတ်ဆက်ထားရှိခြင်းကြောင့် သင်ယူသူများ၏လေ့လာမှုအတွက် ပိုမိုလွယ်ကူချောမွေ့ပြီး အကျိုးရှိစေမည် ဖြစ်ပါသည်။

၃။ ဘလော့ (Blogs) - ဘလော့ကဏ္ဍတွင် မြန်မာနိုင်ငံရှိ ဆရာများအတွက် တတ်ကျွမ်းမှုစံသတ်မှတ်ချက် အညွှန်းဘောင် (MTCSF) နှင့် ပဋိပက္ခအခြေအနေရှိ ဆရာများအတွက် (TiCC) လေ့ကျင့်သင်ကြားရေးဆိုင်ရာ အရင်းအမြစ်များနှင့် ချိတ်ဆက်ရေးသားထားသော ဆောင်းပါးတိုများကို ပုံမှန် တင်ဆက်လျက်ရှိပါသည်။ ဤဆောင်းပါးများတွင် ဆရာများအနေဖြင့် ၎င်းတို့၏ ဆရာအတတ်ပညာဆိုင်ရာ အလေ့အကျင့်များ ဖွံ့ဖြိုးတိုးတက်စေရန် လက်တွေ့ကျသည့် အသိအမြင်များ၊ လမ်းညွှန်ချက်များနှင့် မဟာဗျူဟာများကို လေ့လာဆည်းပူးနိုင်မည် ဖြစ်ပါသည်။

၄။ ဆရာအတတ်ပညာဆိုင်ရာ သင်ယူလေ့လာရေးအဖွဲ့များ (Professional Learning Groups) - ဤအဖွဲ့များသည် ဆရာများအချင်းချင်း အပြန်အလှန် ပူးပေါင်းဆောင်ရွက်နိုင်မည့် ရပ်ဝန်းများဖြစ်ပြီး ဆရာများအနေဖြင့် ခေါင်းစဉ်အကြောင်းအရာအလိုက် အကြံပြုဆွေးနွေးခြင်း၊ အတွေ့အကြုံများ ဖလှယ်ခြင်းနှင့် အလေ့အကျင့်ကောင်းများ မျှဝေခြင်းတို့ကို လုပ်ဆောင်နိုင်ပါသည်။ ထို့ပြင် လုပ်ဖော်ကိုင်ဖက်အချင်းချင်းနှင့် အတွေ့အကြုံရှိ ဆရာများထံမှ လေ့လာဆည်းပူးနိုင်ရန် အခွင့်အလမ်းများလည်း ရရှိမည် ဖြစ်ပါသည်။ ဤအဖွဲ့များတွင် တက်ကြွစွာ ပါဝင်ခြင်းအားဖြင့် ဆရာများသည် မိမိတို့၏ ပညာရေးဆိုင်ရာ ကွန်ရက်များကို ချဲ့ထွင်နိုင်ကာ ပူးပေါင်းဆောင်ရွက်မှုအလေ့အထကို ပိုမိုအားကောင်းလာစေမည်ဖြစ်ပြီး လုပ်ငန်းအလေ့အထတူ အသိုက်အဝန်း (Community of Practice) တစ်ရပ်အတွင်း ချိတ်ဆက်ပါဝင်နိုင်မည် ဖြစ်ပါသည်။

Myanmar Teacher Platform (MTP) သည် သင်ယူမှုဝက်ဘ်ဆိုက်တစ်ခုဆိုသည်ထက် ပိုမိုသော အတွေ့အကြုံများနှင့် အခွင့်အလမ်းများကို ပေးစွမ်းသော နေရာတစ်ခုဖြစ်ပါသည်။ ဤရပ်ဝန်းတွင် ဆရာများအနေဖြင့် ဆရာအတတ်ပညာ စဉ်ဆက်မပြတ် စွမ်းဆောင်ရည်ဖွံ့ဖြိုးတိုးတက်မှုအတွက် မြန်မာနိုင်ငံအရပ်ရပ်မှ ဆရာများနှင့် ချိတ်ဆက်ပြီး ပူးပေါင်းဆောင်ရွက်ခြင်းတို့ကို လုပ်ဆောင်နိုင်သည်။ ထို့ပြင် သင်တန်းများတက်ရောက်ခြင်း၊ အရင်းအမြစ်များကို အသုံးချခြင်း၊ ဆရာအတတ်ပညာဆိုင်ရာ သင်ယူလေ့လာရေးအဖွဲ့များတွင် ပါဝင်ဆောင်ရွက်ခြင်းတို့ဖြင့် ဆရာများသည် မိမိတို့၏ သင်ကြားရေးစွမ်းရည်ကို ပိုမိုအားကောင်းလာစေနိုင်ပြီး ဆရာအတတ်ပညာဆိုင်ရာ ကွန်ရက်များကို ချဲ့ထွင်နိုင်ကာ သင်ယူသူအားလုံးအတွက် အရည်အသွေးပြည့်ဝပြီး အားလုံးပါဝင်နိုင်သော၊ သာတူညီမျှမှုရှိသော ပညာရေးကို ဖော်ဆောင်ရာတွင် တက်ကြွစွာ ပါဝင်ဆောင်ရွက်နိုင်မည် ဖြစ်သည်။